كارثة ..الفيس بوك يطالب بترشيح علاء مبارك رئيسا لمصر و مبارك رئيس شرفي مدى الحياة

[asmaa]

قامت مجموعة من محبي "علاء مبارك" بعمل صفحة خاصة على موقع التواصل الاجتماعي الفيس بوك بعنوان " الحملة الرسمية للمطالبة بترشيح السيد علاء مبارك للرئاسة" وبلغ عدد أعضاء هذه الصفحة 250 عضو وكتبت هذه الكلمات فى تعريف أهداف الصفحة " نطالب السيد علاء مبارك بالترشح للرئاسة لعام 2012


ونطالب بتعين الرئيس مبارك رئيس شرفي مدى الحياة" وتم وضع صورة "علاءمبارك" على الصفحة وصورة الرئيس المخلوع مبارك على حائط الصفحة وأيضا عدد كبير من الأخبار والفيديوهات للأحداث اليومية فى مصر كما تم وضع صورة مرسوم عليها قبر المشير ووضع عليها تعليق يقول "ذنب الريس يا مشير مش دول إلي حماتهوم..

وجيت على الريس عشانهم فاكر ان هايطمر فيهم... يابني من فات قديمه تاه" أيضا تم وضع تعليقات أخرى على حائط الصفحة تم نقلها من صفحة "أنا أسف يا ريس".


المسؤل الحقيقى عن الفساد


الفساد الحقيقي كان نابعا من الشعب نفسه



والدليل علي ذلك كلام ربنا في كتابه العزيز" ظهر الفساد في البر والبحر بما كسبت ايدي الناس ليذيقهم بعض الذي عملوا" صدق الله العظيم



والدليل علي كدا بردو.. ان الي كان بيرمي زباله في الشوارع كان الشعب



... والموظف المرتشي كان من الشعب



والسواق المستغل كان من الشعب



والضابط الظالم كان من الشعب



والمحامي الي مش نزيه الي بيدافع عن الباطل كان من الشعب



والقاضي الغير عادل كان من الشعب



والطبيب الي بيسرق اعضاء او بيغتصب مرضاه كان من الشعب



والمهندس الي كان بيغش وتقع العماره كان من الشعب



والشاب الي بيشرب مخدرات بردو من الشعب



والاب الي كان بيرمي اولاده في الشارع عشان اتجوز واحده تانيه كان من الشعب



والابن الي رمي ابوه في الشارع وحجر علي امواله كان من الشعب



البنت الي رمت امها في دار مسنين ومراعتهاش في كبر سنها كانت من الشعب



والاخ الي ظلم اخته في الميراث كان من الشعب



الهمج الي مكنوش بيحترموا الطابور كانو من الشعب



والي كانوا بيمشوا عكسي بردو كانو من الشعب



والمتهورين الي كانوا بيسوقوا بسرعه جنونيه وضيعوا ارواح الناس كانو من الشعب



اعتقد مش الرئيس مبارك هو سوبر مان الي كان بيعمل كل دا في البلد



واعتقد النماذج دي كفايا ان ربنا بسببهم يبتلي هذه الامه وهذا الشعب بالذل والظلم والفقر والهوان


فكل ما يحدث لنا هو مقدر ومكتوب علينا من ربنا الي اسمه العدل الذي لايغفل ولا ينام



فالي فاهم ان برحيل الرئيس مبارك كل المشاكل اتحلت يبقي غلطان



بالعكس لازم يتنظر حاكما اكثر ظلما وقهرا



لان الفساد كان نابعا من قعده المجتمع وليس من راس النظام



ولابد ان يصلح المجتمع ليفرز لنا المحامي المحترم والقاضي العادل والطبيب الامين والمعلم الفاضل والضابط النزيه والموظف المنتج المجتهد العفيف والمسؤل المحترم والوزير الناجح العادل الشريف



ومن لا يريد ان يفهم الحقيقه فلا يلوم الا نفسه حينما يكتشف ان ما يعيشه من احلام التغيير هي مجرد وهم وهيفوق منه علي كابوس مفزع وواقع مرير.



وبتلك الصفحة تبين لنا أن هناك مؤشرات لا يعلمها الكثير من المواطنين عن الذي يحدث ويدور خلف الأسوار.

[amel63]

مجموعة من محبي مين ؟؟ "علاء مبارك" ؟؟
شكل الخطبة دي كتبها لهم جمال مبارك من لجنة سياسات طـره !!
كتبها على شرف أخوه لأنه قال مادام الشعب مش طايقني نخلّي
علاء يمسك الحُكـم بدل ما ميراث العيلة يروح لشخص غريب !!
حقيقي مجموعة عجيبة وغريبة وكاتبة كلام فارغ. لو الشعب أصلاً
فيه كل المساويء دي.. وأفرز سلبيات كثيرة تشمل القاضي والضابط
والموظف والمهندس والطبيب والمحامي والعامل وغيرهم.. هل الناس
دي اتولدت كده.. أم أنها عاشت في ظل نظام فاسد قمعي أناني لا يهمه
إلا مصلحته وسُلطانه وهيلمانه ؟؟ نظام وضع قوانين لتسيير الحياة لكنه
كان أول من يرفض تطبيقها على نفسه وأفراد حاشيته وطبقوها على
الشعب فقط. مين اخترع جُملة " انت مش عارف أنا مين " و " انت
مش عارف بتكلم مين " ؟؟ مين اخترع المحسوبيات والكوسة والقرع
والنفاق والرياء علشان الناس تمجّدهم وبالتالي الناس بقوا يتعاملوا كده
في حياتهم ؟؟ هي دي كانت العيشة ودي كانت الحياة. لو الابن سيء..
أول واحد بيسألوا عنه هو الأب أو الأم. لو الشعب سيء.. أول شيء
لازم يسألوا عنه هو الحاكم. ياريت يفتكروا كويس إن إذا كان رب البيت
بالـدُف ضارباً.. شوفوا بقى شيمة أهل البيت حتكون إيه !! وبعدين لو
الوقت الحالي وما بعد الثورة فاشل.. ليه لازم يكون الحاكم القادم من
عائلة المخلوع ؟؟ مين وضع القانون ده ؟؟ ومين علاء ده علشان يحكم ؟؟
هم مكتوبين عالمصريين إلى يوم الدين ؟؟ الناس الكاتبة الحكاية دي فاضية
أو مدسوسة.. لأنها عاوزة تسـتفـز الشعب وتملأ الدنيا بالجدل والمهاترات
والغضب والغيظ واحنا مش ناقصين. والله غلطان مَن يرد عليهـم.. وأنا
أول الغلطانين. بجـد لطاف ودمهم خفيف وأخر ظرف.. ومش عارفة
جايبين ده كله منين ؟؟ يا ترى وارثينــه عن العائلة المباركية الملكية
المصرية النصف بريطانية برضه ولّا من مين ؟؟
ربنا يكفينا شر الهبل عالشيطنة..
ولا حول ولا قوة إلا بالله.

شـكـراً أسـمـاء.