فضفضة تيك أواى

[mahranman]

	بسم الله واللهم صل وسلم على رسول الله وسط جو من الشد والقلق - يمكن مش انا بس اللى حاسس بيه - فكرت اننا نعمل هنا استراحه وفضفضه بعيد عن اى حوارات وسياسات وخلافه هنا معانا استراحه عضو على السريع تيك اواى يعنى والمطلوب يشرفنا اول عضو يشوف الموضوع ويتكرم بالدردشه معانا ويتكرم بترشيح عضو تانى من بعده هل من مشارك ؟؟ اتفضل شاى 1-باقة ورد لمن تهديها ؟؟ 2-إسم صديقك ؟؟ 3-اسوأ خبر سمعته ؟؟ 4-شخص لاترفض له طلبا ؟؟ 5-من مطربك_شيخك_ المفضل ؟؟ 6-ماهي التجربه التي تتمنى تكرارها ؟؟ 7-من هو توأم روحك ؟؟ 8-ماهو اكثر شئ تخشاه ؟؟ 9-مالذي يشعرك بأكثر قدر من الحرج ؟؟ 10-رسالة وصلتك من مجهول فممن تتمنى ان تكون ؟ اتفضل قهوة 1- أمنية شخصيه وأخرى اجتماعية 2- حصل وارتبطت نفسيا بأى درجه بأى حد قبل كده 3- لو اجابة البند 2 بنعم يبقى السؤال وانتهى الى ايه الأرتباط ولو الأجابه لا يبقى ليه لم ترتبط بأى حد 4- ايه رأيك فى القنوات الغنائية والمعنيه بالأفلام والمسلسلات 5- لو حصل واتكسر خاطرك من شخص ما .. تعمل ايه 6- الأستمرار فى تجربه جميله ولكن بلا أمل أفضل أم التوقف مع احتمال الألم أفضل 7- ايهما تفضل ..الغروب .. ولا الشروق.. وليه 8- بأمانه .. تفضل الأنتصار لكرامتك ام كرامة من يحب 9- اليأس ..ممكن يكون راحه فى بعض الأحيان ...موافق ولا مش 10- هل لديك أقوال أخرى مين ها يشرفنا ؟؟؟ والسلام عليكم ورحمة الله وبركاته -

[100 فـــل]

كل دي أسئلة وتيك اواي ..؟ أمّال لو مش تيك اواي كانت بقت أد إيه ..؟
حلف لفّة طويلة ممكن توصل لحد بكرة ،،

[mahranman]

المشاركة الأصلية كتبت بواسطة 100 فـــل

كل دي أسئلة وتيك اواي ..؟ أمّال لو مش تيك اواي كانت بقت أد إيه ..؟
حلف لفّة طويلة ممكن توصل لحد بكرة ،،

السلام عليكم ورحمة الله وبركاته


الحمد لله

اهو اول المشاركات والمشاركين

مشرفتنا النشيطه 100فل

فى انتظار مشاركتها ومرشحها او مرشحتها من بعده

بس نتمنى ما تأخر علينا

وطبعا السئله خفيفه مش صعبه رغم انهم 20 سؤال بس

والسلام عليكم ورحمة الله وبركاته

-

[100 فـــل]

المشاركة الأصلية كتبت بواسطة mahranman

السلام عليكم ورحمة الله وبركاته

الحمد لله

اهو اول المشاركات والمشاركين

مشرفتنا النشيطه 100فل

فى انتظار مشاركتها ومرشحها او مرشحتها من بعده

بس نتمنى ما تأخر علينا

وطبعا السئله خفيفه مش صعبه رغم انهم 20 سؤال بس

والسلام عليكم ورحمة الله وبركاته

-

إيه ده يا مهران .. ؟ يعني أنا قلت حلف لفّة وارجع اتاابع الموضوع ألاقي نفسي اتدبست التدبيسة دي ..؟

طيّب ..

::أسئلة الشااي ::

1- باقة ورد لمن تهديها ؟
ج: للناس اللي بحبهم ..

2- اسم صديقتي :
ج: رانية ..

3- أسوأ خبر سمعته ؟
ج: يوم وفاة أمي الله يرحمها ،، كنت لسة خارجة رايحة أزورها في المستشفى جاني الخبر ،، وكنت لوحدي في البيت ،، وحسيت ان الأرض بتلف تحت منّي ،، إحسااس صعب أوي ،، ربنا ما يكتبه على حد ..

4- شخص لا ترفض له طلباً ؟
ج: بابايا ،، ههههههههههه ،، مُجبَر أخاك لا بطل ،، طلباته أوامر من غير نقاااش ..

5- من مطربك – شيخك – المفضل ؟
ج: شيخي المفضل : بسمع لكتييييير ،، لكن بتعلم من : عبد الباسط عبد الصمد ،، الحصري + مشايخي اللي بحفظ على إديهم ،، ربنا يجازيهم عنّي كل خير ..
معنديش مطرب مفضل ،، بس بسمع حاجات معينة فـ أوقات معينة ( حسب الموود ) ،، ومعظمها لفيروز و أم كلثوم ..


6- ما هي التجربة التي تتمنى تكرارها ؟
ج: مش فاهمة تقصد إيه بالتجربة ( سؤال مش محدد ) ،، لكن لو تقصد تجربة حياتية وفي العموم فكلها تجارب مؤلمة ،، وبالتالي ما اتمناش تكرارها ،، وما يغرّكش الاسم ( 100 فل ) ده اللي بتمناه ،، لكن الوااقع غير كدة خاالص ..

لكن لو عكست السؤال وقلت : ما هي التجربة التي لا تتمنى تكرارها ؟ حقوللك : عدم الاستقرار ،، وكثرة الترحال


7- من هو توأم روحك ؟
ج: كل شخص قريّب منّي ،، برتاح له ،، وبشوف صورتي فـ مرايته ،، بعتبره توأم روحي ،، وهُم كُثْرُ ،، والحمد لله ..

8- ما هو أكثر شيء تخشاه ؟
ج: غضب ربنا عليّ ،، وبترعب وانا بقرأ آية من سورة الكهف :" قل هل أنبئكم بالأخسرين أعمالاً الذين ضلّ سعيهم في الحياة الدنيا وهو يحسبون أنهم يحسنون صنعاً " الآية دي بترعبني بصورة غير طبيعية ،، وببكي منها ،، وبتمنى من ربنا إني ما كنش من هؤلاء ..

9- ما الذي يشعرك بأكثر قدر من الحرج ؟
ج: لمّا حد من الطلبة بتوعي يسألني سؤال ،، وما يكنش ذهني حااضر معااه ،، هو صحيح موقف ناادراً ما يحدث ،، وبعرف اتصرّف وقتها ،، لكني بشعر بالحرج بيني وبين نفسي ..

10- رسالة وصلتك من مجهول ،، فممن تتمنى أن تكون ؟
ج: منه هو أكيد ،، أكيد منه هو ..

:: أسئلة القهوة ::

1- أمنية شخصية وأخرى اجتماعية ؟
ج: - الشخصية : بتمنى ربنا يكون راضي عليّ ،، " ياارب رضاك والجنة " ،، غير كدة كله إلى زواال ..

- والاجتماعية : إن الناس – وانا أولهم - تتخلّص من سلبياتها ،، نفسي كل حااجة تمشي صح ح ،، هو صعب ويمكن مستحيل ،، بس دي أمنيتي فعلااً ..

2- حصل وارتبطت نفسياً بأي درجة بأي حد قبل كدة ؟
ج: حصل .


3- لو إجابة البند 2 بنعم يبقى السؤال وانتهى إلى ايه الارتباط ولو الإجابه لا يبقى ليه لم ترتبط بأى حد
ج: خللي بالك هو السؤال ارتباط نفسي ،، مش حاجة تانية .. شووف ،، هي المسألة بتكون إرسال واستقبال من الطرفين ،، بمعنى إن أنا لو برتااح لـ ( س ) من الناس ،، فأكيد لو هو بيستقبل كويس حيوصل له الإحساس ده ،، والعكس صحيح ،، وفي النهاية حتكون المحصلة حاجة جميلة أكيد إنك تلاقي حد ترتاح له ويرتاح لك ،، أنا حصل معايا لأني من نعم ربنا عليّ إني بستقبل كويس ،، وكونت علاقات طيبة كتيرة ،، والحمد لله ناس كتير أصغر منّي وأكبر منّي وفـ سنّي بيرتاحوا في الكلام معايا ،، ودي أكتر حاجة بتسعدني ..


4- إيه رأيك فى القنوات الغنائية والمعنية بالأفلام والمسلسلات ؟
ج: صدااع ،، بس انا بحب اتفرج على بعض أفلام الأبيض والأسود ،، والأفلام الأجنبية بتستهويني ..


5- لو حصل واتكسر خاطرك من شخص ما .. تعمل إيه ؟
ج: بيحصل كتير ،، وناس بكون متعشمة فيهم أوي ،، لكن للأسف بيخزلوني وبيكسروا بخاطري ،، ووقتها ما بعملش حاجة غير إني اقول : " وأفوض أمري إلى الله إن الله بصير بالعباد " ،، وبرددها كتير لحد ما ربنا ينزّل السكينة فـ ألبي ..


6- الاستمرار فى تجربة جميلة ولكن بلا أمل أفضل أم التوقف مع احتمال الألم أفضل ؟
ج: شوف ،، ألم سااعة ولا كل سااعة ،، أنا إيه اللي يخلليني أستمر فـ تجربة – حتى لو جميلة - مفيش منها رجا ..؟ غاوية أعذب نفسي ..؟! ،، ما بحبش أنا الناس اللي بتعلّق نفسها في الحبال الداايبة ويقولوا بينهم وبين نفسهم : ×× .. " خللينا نجرّب على أمل .. " .. ×× ياريت نفكر بعقلنا شوية ،، مش بحاجة تانية ..

7- أيهما تفضل ..الغروب .. ولا الشروق.. وليه ؟
ج: كل وقت وله سحره بالنسبة لي ،، منظر الغروب راائع ورومانسي وفيه مَدْعاة للتأمّل ،، لكن الشروق بيدّيني إحساس بالديناميكية أكتر ،، لأ .. أنا أختار الشروق .. نقول 60% شروق ،، و40% غروب ..

8- بأمانة .. تفضل الانتصار لكرامتك أم كرامة من يحب ؟
ج: مين اللي بيحب ،، تقصد : " كرامة من تحب " ؟
المفروض إن كرامة اللي بحبه من كرامتي ،، والعكس صحيح ،، فمفيش فرق بينهم ،، لكن لو ع المفاضلة ،، فأنا بطبعي بحب الإيثار ،، وباجي على نفسي أوي عشان غيري ،، حتى لو غيري ده ما يستاهلش ،، فما بالك بئا لو بحبه .. ؟

9- اليأس ..ممكن يكون راحة فى بعض الأحيان ...موافق ولا مش ؟
ج: مش طبعاً ،، بس من غير دوود ..

10- هل لديك أقوال أخرى ؟
ج: فيه بعض الأسئلة محتاجة تراجع صياغتها ،، أنا جاوبت على كل الأسئلة على أد فهمي ،، وميرسي ع الاستضاافة والشاي والقهوة ،،

مين ها يشرفنا ؟؟؟

مهران مان

[هروب]

كم هي رائعه الفكره تسلم ايدك

[sea of love]

أولا موضوع رائع جدا مهران مان وبيساعدنا نعرف بعض اكتر

تسلم الأيادي مهران ،،،،،

تانيا ميييييييييييييييت فل وعشرة منورة بإجاباتك الجميله

وشخصيتك اللذيذه ربنا يسعدك ياقمررررررر ويحقق لك أحلامك

وفي انتظار مهران مان وفضفضه تيك أواي ،،،،،،